ពត៌មាន

បណ្ណសារដ្ឋានជាតិនៃកម្ពុជា តំណាងដោយលោកជំទាវ ឆែម នាង ទីប្រឹក្សាអមទីស្តីការគណៈរដ្ឋមន្រ្តី និងលោក ម៉ម ចាន់ អនុប្រធានបណ្ណសារដ្ឋានបានទទួលស្វាគមន៍សិស្សវិទ្យាល័យនៃសាលាលីលេ បារាំង រឺណេ ដេកាត ដឹកនាំដោយលោកស្រី ហ្គែល រ៉ូហ្គាសិន មកបំពេញទស្សនកិច្ចសិក្សានៅបណ្ណសារដ្ឋានជាតិនៃកម្ពុជា ដោយផ្តោតសំខាន់លើការសិក្សាស្រាវជ្រាវឯកសារប្រវត្តិសាស្រ្តទាក់ទងនឹងប្រទេសកម្ពុជាក្នុងកំឡុងពេលសង្គ្រាមលោកលើកទី១ដែលតម្កល់ទុកនៅក្នុងបណ្ណសារដ្ឋានជាតិនៃកម្ពុជា។

ជាដំបូង លោកជំទាវ ឆែម នាង បានមានមតិស្វាគមន៍សិស្សនិស្សិតដែលបានបំពេញទស្សនកិច្ចសិក្សាមកកាន់បណ្ណសារដ្ឋានជាតិនៃកម្ពុជា និងបានធ្វើបទបង្ហាញខ្លីអំពីសារបាននៃបណ្ណសារដ្ឋានជាតិនៃកម្ពុជា និងបណ្ណសារសំខាន់ៗដែលមានតម្កល់នៅបណ្ណសារដ្ឋានជាតិនៃកម្ពុជា។

បន្ទាប់មក លោក ម៉ម ចាន់ បានបានដឹកនាំសិស្សានុសិស្សជុំវិញបណ្ណសារដ្ឋានជាតិនៃកម្ពុជាដើម្បីបានមើល និងស្វែងយល់បន្ថែមអំពីកិច្ចការស្នូលរបស់បណ្ណសារដ្ឋានដែលមានដូចជាបន្ទប់ជួសជុលបណ្ណសារ បន្ទប់ធ្វើចំណាត់ថ្នាក់ បន្ទប់បំប្លែងបណ្ណសារទៅជាទម្រង់ឌីជីថល និងបន្ទប់ផែនទី។

សិស្សានុសិស្សទាំងអស់បានស្រាវជ្រាវបណ្ណសារផ្ទាល់ពាក់ព័ន្ធនឹងសង្គា្រមលោកលើកទី១ និងបានសម្តែងចំណាប់អារម្មណ៍ និងសេចក្តីរំភើបរីករាយដែលបានស្រាវជ្រាវបណ្ណសារទាំងនេះដោយផ្ទាល់។

កាលពីព្រឹកថ្ងៃទី២៧ ខែមេសា ឆ្នាំ២០២៣ លោកស្រី កែវ សូនី ប្រធានបណ្ណសារដ្ឋានជាតិនៃកម្ពុជាបានទទួលស្វាគមន៍ លោកជំទាវ ហេលែន ចាវីស (Helen Jarvis) ទីប្រឹក្សារាជរដ្ឋាភិបាលកម្ពុជា និងជាប្រធានអនុកម្មាការចុះបញ្ជីស្មារតីចងចាំពិភពលោកតំបន់អាស៊ីប៉ាស៊ីហ្វិក ឯកឧត្តមបណ្ឌិត ឈុំ ម៉េងហុង អគ្គលេខាធិការស្តីទីគណៈកម្មាការជាតិយូណេស្កូកម្ពុជា និងជាប្រធានក្រុមការងារលេខាធិការដ្ឋានស្មារតីចងចាំពិភព និង លោកស្រី លីង អាន ម៉ូរ៉ូ (Ling Anh Moreau) អគ្គលេខាធិការនៃគណៈកម្មាការស្មារតីចងចាំពិភពលោកប្រចាំតំបន់អាស៊ីប៉ាស៊ីហ្វិក និងក្រុមការងារ ដើម្បីស្វែងយល់អំពីលទ្ធភាពក្នុងការស្នើសុំចុះបញ្ជី «ហ្វុងបណ្ណសាររដ្ឋបាលសម័យបារាំង (រ៉េស៊ីដង់ស៊ុបប៉េរីយើឌុយកាំបូដ) ១៨៦៣-១៩៥៣» ចូលក្នុងកម្មវិធីស្មារតីចងចាំពិភពលោករបស់អង្គការយូណេស្កូ។

លោកស្រី កែវ សូនី បានធ្វើបទបង្ហាញអំពី «ហ្វុងបណ្ណសាររដ្ឋបាលសម័យបារាំង (រ៉េស៊ីដង់ស៊ុបប៉េរីយើឌុយកាំបូដ) ១៨៦៣-១៩៥៣» ជូនដល់គណៈកម្មាការជាតិយូណេស្កូប្រចាំប្រទេសកម្ពុជា និងគណៈកម្មាការស្មារតីចងចាំពិភពលោកប្រចាំតំបន់អាស៊ីប៉ាស៊ីហ្វិក និងក្រុមការងារ អំពីភាពសម្បូរបែបនៃបណ្ណសាររដ្ឋបាលសម័យបារាំងដែលកំពុងត្រូវបានអភិរក្ស និងតម្កល់ទុកនៅបណ្ណសារដ្ឋានជាតិនៃកម្ពុជា ដែលមានដូចជាលិខិតរដ្ឋបាល ផែនទី ប្លង់ ខិត្តបណ្ណ និងរូបថតជាដើមដោយទទួលបានចំណាប់អារម្មណ៍ខ្លាំងពីសំណាក់អ្នកស្រាវជ្រាវជាតិ និងអន្តរជាតិដែលគួរត្រូវបានដាក់បញ្ចូលក្នុងបញ្ជីស្មារតីចងចាំពិភពលោករបស់អង្គការយូណេស្កូ។

បន្ទាប់មកក្រុមការងារបានធ្វើការពិនិត្យបណ្ណសារដោយផ្ទាល់ ហើយបានបង្ហាញចំណាប់អារម្មណ៍ និងសេចក្តីរំភើបរីករាយក្រៃលែងចំពោះ សោភ័ណភាព គុណតម្លៃ និងភាពកម្រនៃបណ្ណសារ។ ក្រុមការងារបានបង្ហាញភាពសុទិដ្ឋិនិយម និងបានវាយតម្លៃខ្ពស់ចំពោះបណ្ណសារទាំងអស់នោះផងដែរ។ ក្រុមការងារគណៈកម្មាការស្មារតីចងចាំពិភពលោកទាំងប្រចាំប្រទេស និងប្រចាំតំបន់អាស៊ីប៉ាស៊ិហ្វិកបានបញ្ជាក់បន្ថែមថា ក្រុមការងារនឹងបន្តផ្តល់កិច្ចសហការល្អ និងការគាំទ្រចាំបាច់ផ្សេងៗចំពោះបណ្ណសារដ្ឋានជាតិនៃកម្ពុជាក្នុងដំណើរការបំពេញពាក្យស្នើសុំដាក់បញ្ចូលបណ្ណសាររដ្ឋបាលសម័យបារាំងក្នុងកម្មវិធីស្មារតីចងចាំពិភពលោករបស់អង្គការយូណេស្កូ។

កាលពីព្រឹកថ្ងៃអង្គារ ទី២៨ ខែមីនា ឆ្នាំ២០២៣ លោកជំទាវ Helen Jarvis ទីប្រឹក្សារាជរដ្ឋាភិបាលកម្ពុជា បាននាំយកឯកសារផ្ទាល់ខ្លួនរបស់លោកជំទាវពីឆ្នាំ១៩៩១​ មកប្រគល់ជូនលោកស្រី កែវ សូនី ប្រធានបណ្ណសារដ្ឋានជាតិនៃកម្ពុជា ដើម្បីតម្កល់ទុកសម្រាប់បម្រើជាប្រយោជន៍ដល់អ្នកស្រាវជ្រាវជាតិនិងអន្តរជាតិដែលមកធ្វើការសិក្សាស្រាវជ្រាវនៅបណ្ណសារដ្ឋានជាតិនៃកម្ពុជា។

គួរបញ្ជាក់ផងដែរថា សំណុំឯកសាររបស់លោកជំទាវ Helen Javris នឹងត្រូវបង្កើតជាសំណុំឯកសាររបស់លោកជំទាវផ្ទាល់ ដែលមានឈ្មោះថា Collection Helen Jarvis។

លោកស្រី កែវ សូនី បានថ្លែងអំណរគុណយ៉ាងជ្រាលជ្រៅដល់លោកជំទាវដែលបានប្រគល់ឯកសារផ្ទាល់ខ្លួនមកកាន់បណ្ណសារដ្ឋានជាតិនៃកម្ពុជា និងតែងតែជួយគាំទ្រ និងផ្តល់អនុសាសន៍ និងយោបល់ល្អៗដល់បណ្ណសារដ្ឋានជាតិកន្លងមក។